بھولے بادشاہ

ہم ذرا دیر سے ناشتہ کرنے کے عادی ہیں  نو دس بجے تک ناشتہ کر ہی لیتے  ہیں۔ جاگتے ہی ناشتہ بھی نصیب نہیں ہوتا  اس فکر میں کہ کہیں کوئی خود کش حملہ تو نہیں ہو گیا اور حملہ آور ہمارے نزدیک تو نہیں پہنچ گئے۔ ہم سے کتنی دور ہیں۔ فاصلے وغیرہ کا اندازہ کرکے ، پورا اطمینان کرکے ہی ہم ناشتہ شروع کرتے ہیں۔ لہذا ناشتہ سے  پہلے ٹی وی آن کرتے ہیں کہ کہیں کچھ ہو تو نہیں گیا۔ اور ہمیشہ کچھ ہو ہی گیا ہوتا ہے۔آج بھی کچھ نہیں ،  بلکہ بہت کچھ ہو گیا ہوا تھا۔ لاہور میں تین تین مقامات حملے کی زد میں تھے۔ ناشتہ واشتہ سب بھول بھال گیا۔ گھر والوں کے متوجہ کرانے پر ناشتہ کی طرف دھیان کیا۔ چائے تک پہنچتے پہنچتے ایک جگہ (ایف آئی اے) ٹمپل روڈ کی بلڈنگ کو کلئیر قرار دیا جا چکا تھا۔ اتنے میں لائٹ چلے گئی۔ گیارہ بجے روز لائٹ جاتی ہے۔ بارہ بجے تک گھر کے چھوٹے چھوٹے کاموں میں مصروفیت کے ساتھ دھیان اسی طرف لگا ہوا تھا کہ پتہ نہیں کیا ہو رہا ہو۔ بارہ بجے لائٹ آئی۔ پھر اب بھی خبروں کے چینلز ہی آن ہیں۔یہ سلسلہ اب معلوم نہیں کتنی دیر تک چلتا ر ہے۔ اس حملے کی اطلاعات کئی دنوں سے آ رہی تھیں۔ لیکن ہوا پھر بھی کہ حملہ آور کچھ حد تک کامیاب ہو ہی گئے۔ ایف آئی اے کی بلڈنگ کی ٹوٹی پھوٹی عمارت اور خستہ حال نیچی دیواریں مرمت نہیں کی گئیں۔ ان پر کتنا خرچہ آ جانا تھا۔ بلٹ پروف گاڑیوں سے تو کم ہی آتا۔لیکن شاید عام انسان کی زندگی کی اتنی قمیت خیال ہی نہیں کی جاتی۔

ہماری اکثر صبحیں ایسی ہی ہوتی ہیں کہ اب ہماری کوئی صبح‌ بخیر نہیں‌ ہوتی۔

سکول کے زمانے میں جب کلاس میں کسی بچے کو سبق نہ آتا تو اس بچے کو ہر کلاس میں لے جایا جاتا اور  اس کلاس کے بچوں سے کہا جاتا کہ شیم شیم بولو۔ اس بچے نے سبق یاد نہیں کیا یا یہ ہوم ورک کرکے نہیں لایا۔ اسی طرح بچے کو پورے سکول کی ہر کلاس کا وزٹ کروا کے شیم شیم سنوایا جاتا۔ سزا یافتہ بچے کی شکل دیکھ کر جب استاد کو اندازہ ہو جاتا کہ  سزا کا اثر نظر آ رہا ہے  اور بچہ اپنے کئے پر شرمندہ ہے اور خود کو سدھارنے کی کوشش کرے گا تو استاد بچے کی خلاصی کر دیتا۔ لیکن یہ قصہ یہیں پر تمام نہ ہوتا بلکہ کافی دنوں تک سکول اور ہم جماعت اس بچے کو “شیم شیم” کہہ کر چھیڑتے رہتے ۔ بچوں کے علاوہ  اگر کسی بڑے کو بھی ٹوکا جائے یا بتایا جائے کہ تم نے غلط کام کیا ہے تو اسے اپنی غلطی کا احساس  ہو ہی جاتا ہے اور شرمندگی بھی محسوس ہوتی  ہے۔

یہ عام انسان یعنی عوام کی ذہنیت ہے۔ خواص میں یہ قدر اور صفت سرے سے پائی ہی نہیں جاتی۔ ان کو ان کی بری حرکت پہ روکا یہ ٹوکا جائے تو وہ بجائے شرمندہ ہونے کے آنکھیں دکھاتے ہیں جس کی سادہ سی مثال ہمارے ملک کے شوگر مل مالکان ہیں۔ خواص کی ایک قسم اور بھی ہے جو اپنے اندھے اور  بہرے پن کی وجہ سے مشہور ہے۔ یہ قسم حکمرانوں اور بیورو کریٹس پر مشتمل ہے۔ حکمران طبقہ حکمرانی ملتے ہی دو عارضوں میں مبتلا ہو جاتا ہے ایک بہرہ پن اور دوسرا اندھا پن۔ ناں انہیں عوام کی بے بسی اور غربت افلاس نظر آتا ہے ناں انہیں عوام کی آٹے اور چینی کے لیے  چیخ و پکار سنائی دیتی ہے۔ بنے بادشاہ پھرتے ہیں اور کہتے ہیں کہ قیمتیوں کا تعین کرنا یا کنٹرول کرنا میرا کام نہیں ہے۔ اگر آپ حکمران ہو تو پورا ملک آپ کی ذمہ داری نہیں ہے؟ اگر حکمران بن کر بھی آپ کو پتہ نہیں چلا کہ آپ کی کیا ذمہ داری ہے اور آپ کو کیا کرنا ہے تو پھر زیادہ معقول تو یہی لگتا ہے کہ آپ جسیے لوگ اپنا عہدہ چھوڑ دیں۔ ایک کلرک کو بھرتی کرنے سے پہلے اس کی کوالی فیکیشن دیکھی جاتی ہے اس کی ٹائپنگ اسپیڈ وغیرہ کا امتحان لیا جاتا ہے لیکن کیسا نظام اور ظلم  ہے ہمارے ملک کا کہ  ایک “صدر” کی پوسٹ پر آنے والے انسان کی کوالی فیکیشن “رشتہ داری” ہوتی ہے۔ سابقہ تجربہ “بے بی سیٹنگ”۔ موجودہ کارکردگی غیر ملکی غیر ضروری دورے اور ان پر ہونے والا “اربوں روپوں کا خرچہ” اور ملکی خزانے کو بڑا نقصان۔

فوزیہ وہاب نے ارشاد فرمایا ہے کہ “لوگوں کو اب یہ مان لینا چاہیے کہ زرداری صاحب اس ملک کے صدر ہیں اور رہیں گے۔” یہ جملہ مشرف صاحب کی ٹون میں لگ رہا ہے لیکن ان میں اور موجودہ حکمرانوں میں فرق ہی کیا ہے۔ ٹی وی چینلز اور عوام دہائی دے دے کر تھک گئے ہیں کہ زرداری صاحب اپنے غیرملکی دورے کم کردیں اور حکومت اپنے اللے تللے کم کر دے لیکن ناں کبھی حکومت کی جانب سے کوئی وضاحت آئی کہ یہ خرچہ کیوں کیا گیا ناں ہی زرداری صاحب نے کبھی عوام کو بتانا مناسب سمجھا کہ فلاں دورے پر میں اس مقصد لے لیے گیا تھا اور یہ خرچ ہوا اور یہ میں فائدہ لے کر آیا ہوں۔ (فائدے سے آپ صدر صاحب کا ذاتی فائدہ یا ملکی فائدہ دونوں مراد لے سکتے ہیں)۔ ہر بار ناکام آ جاتے ہیں کہیں سے امداد نہیں ملتی لیکن پھر بھی کبھی شرمندگی محسوس نہں کی۔ بلکہ ایک جگہ سے ناکام ہو کر وہیں سے دوسرے ملک چلے جاتے ہیں کہ ان کے پاس اپنی ناکامیوں کا حساب کرنے کا وقت ہی نہیں ہے ناں پرواہ۔  اور شرمندہ کیسے ہوا جاتا ہے یہ تو ان کو معلوم ہی نہیں ہے ۔  اپنے سابقہ دور میں بھی کرپشن کے ریکارڈ بنا کر گئے تھے اور موجودہ دور میں بھی اپنا ہی ریکارڈ توڑنے کی کوشش میں ہیں ۔ اب تو عوام کو خود ہی کہنا پڑنے گا “شیم شیم”  ۔ شاید شرم آ ہی جائے۔

کل ٹی وی میں خبر دیکھی کہ آٹا خریدنے کی لائن میں لگے لوگوں پر پولیس کے اہلکاروں نے لاٹھی چارج کر دیا۔ یہ لوگ تو پہلے ہی سے مرے ہوئے ہیں ان کو کیا مارنا ، غربت، افلاس، بے روز گاری، وسائل کی عدم فراہمی ، مہنگائی نے کمر پہلے ہی توڑ رکھی ہے ۔ باقی رہی سہی ہڈیاں یہ پولیس کے اہلکار توڑنے آ گئے۔
جب سے رمضان شریف شروع ہوا ہے اور حکومت نے سستے آٹے کا اعلان کیا ہے روزانہ ٹی وی پر سستا آٹا خریدنے کے لئے ہوئے دھوپ میں کھڑے لوگوں کی قطاریں حکومت کے سستے آٹے کی فراہمی کے دعووں کا مذاق اڑاتی نظر آ رہی ہیں۔ حکومت کو توفیق نہیں کہ اعداد و شمار اکٹھے کرے کہ کون لوگ مستحق ہیں اور کون نہیں اور مستحق لوگوں تک سستا آٹا پہنچا بھی ہے کہ نہیں ۔ سستے آٹے کی غریب اور مستحق تک فراہمی نہ ہوئی تو پھر کیا فائدہ اس مہم کو شروع کرنے کا ، بند کرو یہ ڈھکوسلہ۔ اگر غریب کو فائدہ پہنچانا ہے تو کوئی سسٹم کوئی طریقہ بنائیں جس سے غریب کو عزت کے ساتھ اس کا حق مل سکے۔ یہ پندرہ منٹ ، آدھ گھنٹہ کے لئے اناج سے بھرے ہوئے ٹرکوں کا نظارہ کرا کے پھر اسے واپس لے جانا اور ڈھکوسلہ نہیں ہے تو کیا ہے کہ جب کوئی ضعیف ، کوئی خاتون اس تک پہنچ ہی نہ سکے۔کیا یہ سارا ڈرامہ عوام کی بے بسی کا تماشہ دیکھنے اور دوسروں کو دکھانے کے لئے کیا جاتا ہے۔ ضرور یہ مناظر دیکھ کر ہمارے حکمرانوں کو بہت تسکین ملتی ہے ۔ اس بات کا اندازہ تو روز قطاروں میں کھڑی عوام کی سستی اجناس کے لئے بڑھتی خواری دیکھ کر لگایا جا سکتا ہے۔

جناح پور کا نقشہ ایم کیو ایم کے دفتر سے برآمد ہونا ایک جنرل کے کہنے پر ایک سازش قرار پایا۔ اس موقع پر ایم کیو ایم کے بانی اور لیڈر الطاف حسین کی جذبات انگیز تقریر سننے کو ملی۔ اس سے پہلے بھی ہم الطاف حسین اور رحمان ملک کی مشترکہ تقریر سن چکے ہیں۔ اس میں بھی جذباتیت تھی لیکن اتنی نہ تھی بس الطاف حسین دوران تقریر رحمان ملک کا اس طرح ہاتھ دبا رہے تھے جیسے دونوں کا نو بیاہتا جوڑا ہو یا پھر لڑکا اور لڑکی پہلی بار ڈیٹ پر آئے ہوں۔ہم بات کر رہے تھے الطاف حسین کی حالیہ تقرر کی جو انہوں نے ایک دو روز پہلے ہی کی ہے۔ اس میں الطاف اپنا رومال نکال نکال کر اور ا سے منہ پر ڈال ڈال کر خوب روئے۔ رومال شاید ایک ہی تھا اس سے آنکھیں صاف کرتے رہے اور اسی سے ناک (اتنی غربت اب ان سے کوئی نہ پوچھے کہ آپ کی فنڈگ کون کرتا ہے۔ اور پیسہ کہاں سے آتا ہے وغیرہ وغیرہ ) ۔ اس تقریر کو سن کر ہمیں اور کسی اور بات کا تو اعتبار نہ آیا ہو لیکن ایک بات کا اعتبار ضرور ہو گیا کہ یہ بندہ کبھی بھوکا مرنے والوں میں سے نہیں ہے۔ یہ اگر لیڈر نہ بھی ہوتا تو بہت بڑا ایکٹر ہوتا اور کئی ایوارڈ جیت چکا ہوتا اور انڈیا تو ضرور جاتا اور کیا پتہ وہاں ہی سکونت اختیار کر لیتا اور رجنی کانت کو ٹف ٹائم دے رہا ہوتا۔ فرض کریں اگر ایکٹر نہ بن پاتا تو میتوں پر بین ڈالنے کا کام تو اتنی خوبی سے کر سکتا ہے کہ اتنے اچھے بین میں نے کبھی کسی مرد کے نہیں سنے ناں حقیقی زندگی میں اور نہ ٹی وی ، فلم میں ۔مردوں کے بین ہیں بھی نایاب ۔ کیونکہ مرد کم ہی روتے ہیں اور وہ بھی ایسے پھوٹ پھوٹ کر۔ یہ تو الطاف حسین کا انمول ٹیلنٹ ہے۔ اسے ان کو ضائع نہیں کر نا چاہیے۔ اور جلد سے جلد سائڈ بزنس کے طور پر بین ڈالنے کا کام تو ضرور شروع کر دینا چاہیے۔ یو۔کے جیسے ملک میں بیٹھے ہیں اور وہاں پر تو ان کی ڈیمانڈ اور بھی زیادہ ہو گی ۔ میرے خیال میں تو اس فن کو روشناس کرانے کا سہرا بھی الطاف حسین کے سر جائے گا۔ انہیں چاہیے کہ جلدی کر لیں کوئی اور ان کی تقریر سن کر آئیڈیا نہ چرا لے۔

پاکستانی عوام ایک بار پھر رمضان کی رحمتوں اور برکتوں کے ساتھ ساتھ ایک امتحان سے بھی گزر رہے ہیں اور وہ امتحان ہے مہنگائی کا۔ حکومت وقت نے پاکستانیوں کی اتنی تذلیل کی ہے جتنی اس سے پہلے کی حکومتیں بھی نہ کر سکیں تھیں۔ لوگ چینی اور آٹا لینے کے لئے لائنوں میں ایسے لگے ہوتے ہیں جیسے کہ مفت بٹ رہا ہے۔ حالانکہ ایسا ہے نہیں ۔ عوام کو تھوڑا سا ریلیف بھی بہت احسان جتا جتا کر دیا جا رہا ہے اور یہ ریلیف بھی ہر کسی کو میسر نہیں ہے ۔ موجودہ دور حکومت میں مہنگائی میں ریکارڈ اضافہ ہوا ہے۔ روٹی ، کپڑا ، مکان دینے کی دعوے دار حکومت نے عوام کو دانے دانے کا محتاج کر دیا ہے۔
حسب حال کچھ اشعار ملاحظہ فرمائیے۔

اب میں راشن کی دکانوں پہ نظر آتا ہوں
اپنے کھیتوں سے بچھڑنے کی سزا پاتا ہوں

کتنی مہنگائی کے بازار سے کچھ لاتا ہوں
اپنے بچوں میں اُسے بانٹ کر شرماتا ہوں

اپنی نیندوں کا لہو پونچھنے کی کوشش میں
جاگتے جاگتے تھک جاتا ہوں، سو جاتا ہوں

کوئی چادر سمجھ کے نہ کھینچ لے پھر سے خلیل
میں کفن اوڑھ کے فٹ پاتھ پہ سو جاتا ہوں